Madi Yang mare makau kaw gasat gala majan matut byin
KIO ginjaw ginra, Madi Yang mare makau kaw, September shata 11 ya shana daw hkying 1:00pm aten daram kaw nna, gumshem Myen hpyen hpung ni hte KIA ni gasat gala majan matut byin ai lam chye lu ai.
Gumshem Myen hpyen dap Hk.L.Y (83) kata na hpyen hpung ni, KIA ni nga ai maga de shamu shamawt pru wa ai kaw dai ni hkying 1:00pm aten kaw na  hkying 7:30pm aten du hkra rai tim laja lana naw ngoi nga ai lam, shawng lam na lit nga ai salang ni kaw na chye lu ai.
Gasat poi byin nga ai Madi Yang hte Nam San Yang, Mai Sak Pa maga de, Bumre Hka Ya kaw nga ai gumshem Myen hpyen ni laknak kaba hte ding yang ngu na gap bun nga ai lam chye lu ai.
Gumshem Myen hpyen dap ni gaw, 2023 ning July shata praw kaw nna KIO ginjaw ginra de, hpyen n-gun hkying lam hte htu shadut tawt lai shang wa ai majaw, KIA hte gasat gala majan byin ai shata 2 jan du nga sai re.
Manmaw, Myitkyina maga de na gumshem Myen hpyen dap ni, hpyen lang arung arai, malu masha hte hpyen n-gun jat nga ding yang rai nna, ndai tai hpyen ni hpe KIA ni lam lapran kaw hkap gap gasat ai lam ni ding yang galaw nga ai re hpe mung chye lu ai.
