Manmaw ginwang KBC ramma Chyum sharin hpawng galaw na matu hkyen shajin nga

Manmaw ginwang, Manje buga hkalup hpung nawku jawng wang kaw KBC ramma Chyum sharin hpawng galaw na matu, hkyen shajin nga ai lam, Manje buga masha ni kaw na chye lu ai.

September shata 11 ya shani gaw, Manje nawku jawng kaw Chyum sharin hpawng galaw ai hta hkyen shajin ra ai lam hte sub komiti ni hpe hpaw shabawn nhtawm, ra kaji ra kaba yawng hpe bawngban dawdan ai hpawng galaw la lu sai lam, hpawng hta shanglawm ai salang langai tsun ai.

Sub komiti hta Shim, Dawjau, Mawn sumli, Manam hkalum, malu masha, modo cycle sin, Hka, Wan, htaw wa htaw sa hte gat seng hpung ngu nna, group hpe garan da lu sai lam, salang wa matut tsun ai.

Ndai ramma Chyum sharin hpawng gaw, Manmaw ginwang kata na buga hpung 45 kaw na ramma n-gun marai (800) na matu hkyen lajang da ai re.

Chyum sharin hpawng hpe du wa na October shata praw 5 ya shani manam zup nhtawm, praw 6 ya shani kaw na praw 8, masum ya sharin nna, praw 9 ya shani gaw manam bra na re lam chye lu ai.