Daru Hka kaw dap jung nga ai gumshem Myen hpyen dap hpe KIA ni gasat zing la lu
KIA Masat (1) Dap Ba ginra, Daru Hka kaw dap jung nga ai gumshem Myen hpyen dap hpe September shata 20 ya jahpawt hkying 7:30am aten daram hta KIA, pawng hpawm hpyen hpung ni sa htim gasat zing la lu ai lam chye lu ai.
Tang Hpre hte Sumpra Bum lammaw kaba makau kaw dap jung nga ai hpyen dap rai nna, KIA Masat (1) Dap Ba kata na Masat (10) Dap Dung, Masat (22) Dap Dung hte KPDF pawng hpawm hpyen hpung ni sa htim gasat padang dip zing la lu sai lam chye lu ai.
KIA, pawng hpawm hpyen hpung ni sa htim gasat zing la lu ai hta gumshem Myen hpyen maga na si hkala ai law ai hte laknak machyu pala ni hpe mung zin la lu ai re.
Dai hpyen dap gaw Myitkyina Putao lam laiwa laisa Modo ni kaw gumhpraw hta sha nga ai rai nna, mung mare sha ni hpe mung jahkrit shama ai lam ni galaw nga ai hpe chye lu ai.
September shata 20 ya shani hta sha, KIA Masat (3) Dap Ba ginra, Sang hpaw lung wa ai Mali hka lam maga de, sang hpaw lung wa ai ni hpe shimlam la ya ai hku nna, Manje kaw dap jung nga ai gumshem Myen hpyen dap Hk.M.Y (319) dap hte Hk.M.Y (601) dap ni, sinat kaba ni hkrup mara gap bun nga ai lam, ginra masha ni kaw na chye lu ai.
Matut nna, Ginjaw ginra, Nam San Yang hpyen man, Madi Yang hpyen man maga de mung, laknak kaba ni hte shani shagu ngu na gap hkat nga ding yang rai nna, hpyen masa mung shaja hkat nga ding yang re lam, shawng lam na lit nga ai salang ni kaw na chye lu ai.
