Masat Yan (16) Balik jawng yu hpawng lamang galaw
Wunpawng Mungdan Shanglawt Asuya, Mungchying Uphkang Balik Makan Dap kaw nna, hpaw sharin ai Masat yan (16) Balik jawng yu hpawng hpe September shata 30 ya jahpawt hkying 9:00am aten hta Balik Ning-awn Gawknu kaw galaw la lu sai re.
Hpawng hta Du Daju Lahpai Zau Raw (D.G.A Lit Hkam) kaw nna, shatsam mungga tsun ai hta “Mungchying masha ni a sutgan shimlam lu na ngwi pyaw simsa lam lu ra ai, mungshawa wuhpung hta tara rep ra ai lam nnga yang, ndai ahkyak lami laman ni gaw mungshawa akyu ara lam re majaw, mungchying uphkang dap a tsaw htum ai lit hku gun hpai nga ai re. Mungdan kata tara kang lam nga hkra uphkang na lit nga ai, ta tut hkrang pru awng dang lu na matu mungchying uphkang dap a lagaw lata tai ya lu ai Balik ni byin tai wa u ga” nga nna tsun ai.
Hpawng lamang hta Dabang Reng kaw nna, jawng sumtang hti ai lam, jawng yu lakmat shagrau ai lam hte Ningtawn kumhpa shagrau ai. Dai hpang jawngma ni kaw nna hpyen hprim madun ai lam ni galaw ai.
Dai ni Balik jawng yu lakmat la ai jawngma yawng marai 71 rai nna, ndai Balik wunkat jawng hpe lai wa sai May shata kaw nna September shata du hkra shata 4 sharin la lu sai re.
Hpawng hta saw shaga da ai hpung woi sara kaba ni, Makgam Dap, Makan Dap kaw na myitsu salang ni, jawng ma kanu kawa ni hte jawngma ni sa du shang lawm ai hte galaw la lu sai hpe chye lu ai.
