Nam San Yang hpyen man de gumshem Myen hpyen dap ni numdaw 3 lang nbungli hte sa htim gap
Nam San Yang hpyen man rai nga ai Lai Lum Awng Ja mare hta gumshem Myen hpyen dap ni October shata praw 2 ya jahpawt nbungli 3 hte numdaw 3 lang wa htim gap ai lam chye lu ai.
Hkying 8:40am hta kalang, hkying 9:09am hta kalang, hkying 9:14am hta kalang wa htim gap ai re lam chye lu ai.
Nam San Yang hpyen man maga de ya aten, KIA hte gumshem Myen hpyen dap lapran, laja lana gasat gala majan matut byin nga ai hte lahkawng maga shada laknak kaba ni hte mung, matut manoi gap bun hkat nga ai re.
Gasat gala majan byin nga ai hta Myen hpyen dap maga sum machyi ai lam ni law taw nga ai re majaw, Hkaya Bum, Bumre Bum, Hkangkai Bum ni kaw na, makau grup yin shara shagu de laknak kaba gap shadam bun nga ai.
Dai hpawt hkying 7:30 aten hta mung, Pangsak makau de htu shadut shamu shamawt hkawm ai, gumshem Myen hpyen dap HK.M.Y (438) dap ni hpe KIA Dung (25) pawng hpawm dap ni ninghkap gasat dat ai lam ni nga ai.
Lai wa sai September shata 30 ya shani hta mung, KIA Masat (25) Dap Dung ginra, Num Lang hte U Htang Yang lapran na Shang Dum Bum na yu wa ai, gumshem Myen hpyen dap hte KIA pawng hpawm hpyen hpung ni gasat gala majan byin ai hta KIA ni padang dip la lu ai lam ni nga ai hpe chye lu ai.
