Lailum Awng Ja mayan kaw gumshem Myen hpyen dap hte KIA ni gasat gala majan laja lana matut byin nga
Lailum Awng Ja mayan kaw October shata 10 ya shani gumshem Myen hpyen dap hte KIA ni gasat gala majan laja lana matut byin nga ai lam chye lu ai.
Gasat poi byin ai hta gumshem Myen hpyen dap ni Myitkyina kaw na Jet Fighter (2) hte bawm wa jahkrat bun nna, Hka Ya, Bum Re bum kaw na mung, gasat gala majan byin ai shara maga de laknak kaba gap garum bun ai, dai hpang KIA ni hku nna mung laknak kaba hte bai nhtang gap bun ai lam nga ai.
Ya aten hta gumshem Myen dap hte KIA ni hpyen masa shaja hkat nga dingyang re majaw, gasat gala majan matut byin wa mai ai lam lit nga ai salang ni tsun ai kaw na chye lu ai.
Matut nna Mukmyit Sinli Ga (Kachin Sub-state) KIA Masat (10) Dap Ba, Masat (2) Dap Dung ginra hta mung, October shata (10) ya shani ka-ang hkying 12:45pm aten daram hta gumshem Myen hpyen dap hte KIA ni gasat gala majan byin ai lam chye lu ai.
Dai gumshem Myen hpyen dap ni gaw KIA ni nga na shadu ai shara de laknak kaba hkrup mara gap shadam bun ai lam shawng lam na lit nga ai salang ni kaw na chye lu ai.
