Gumshem Myen hpyen ni hpe KIA ni hkap gap gasat
Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra, Nga Rem Dabang lawu kaw October shata 11 ya shani hkying 10:28am aten hta gumshem Myen hpyen ni hpe KIA ni hkap gap gasat ai lam chye lu ai.
Kawng Hkam maga kaw nna shamu shamawt lung wa ai gumshem Myen hpyen hpung ni hpe Nga Rem dabang lawu kaw, KIA ni hkap shingla gasat ai kawn gasat poi byin ai lam shawng lam na lit nga ai salang ni tsun ai kaw na chye lu ai.
October shata 11 ya shani hta sha, KIA Masat (5) Dap Ba, Masat (19) Dap Nawng Dap Dung ginra hte Masat (25) Dap Nawng Dap Dung ginra, Nawng Gawn maga de na lung wa ai gumshem Myen hpyen n-gun (40) daram hte hpyen lang arung arai htaw ai modo 5 hpung ni hpe, Loi Je Bum hte Ting Ngyet lapran kaw, KIA ni hkap gap gasat dat ai re.
Dai hpang modo 3 gaw gumshem Myen hpyen dap Hk.L.Y (142) dap kaw arung arai ni wa sa da nna, Ting Hpara maga de bai nhtang wa mat ai lam chye lu ai.
Gumshem Myen hpyen ni machyi hkala hkrum ai majaw, dai ni October shata 12 ya shana daw hkying hkying 5:00pm aten daram kaw nna, Daw Hpum Yang mare a, sinna maga na Lung Jung Yang mare hpe wan nat taw nga ai lam, shawng lam na lit nga ai salang ni shana wa ai kaw na chye lu ai.
KIO ginjaw ginra, Lai Lum Awng Ja grup-yin shara ni hta mung, Bumre, Hka Ya Bum kaw nga ai gumshem Myen hpyen dap ni shani shagu laknak kaba gap bun nga ai sha n-ga, Tada Oo hte Myitkyina kaw nna rawt wa ai Jet Fighter nbungli hte Rocket bawm ni wa jahkrat, gap bun ai hpe mung chye lu ai.
