Dingga Yang mare mungshawa dum nta ni hpe gumshem Myen hpyen ni wan nat jahten
Myitkyina, Manmaw lam Dingga Yang mare na mungshawa dum nta (10) jan hpe October shata 15 ya jahpawt hta gumshem Myen hpyen ni wan nat jahten kau ya ai lam chye lu ai.
Gumshem Myen hpyen dap, Dapnu (88) kata na hpyen hpung ni, Octber shata 14 ya shana hta Dingga Yang mare kaw yup hkring sa la nna, dai hpawt hkying 8:00am aten daram kaw nna, mare hpe wan bai nat kau ya ai hta nta 10 jan hte nawku jawng, laika sharin jawng ni mung hkru lawm mat ai lam, ginra shiga lawk kaw na chye lu ai.
Nawng Wan maga de nga ai gumshem Myen hpyen ni mung, October shata 15 ya shani hkying 11:40am aten hta Dawhpum Yang mare de laknak kaba 2 lang gap bang dat ai hta, pala si langai Myen hpyen kongsi htwi uk rung makau kaw wa hkrat kapaw ai majaw, mungmasha Num langai hkala hkrum ai lam na chye lu ai.
Ndai October shata 12 ya shani hta mung, Daw Hpum Yang makau Lung Jung Yang mare na mungshawa dum nta htinggaw 11 hpe gumshem Myen hpyen ni wan nat jahten kau ai lam mung nga sai re.
Ya aten KIO ginjaw ginra hta gumshem Myen hpyen ni hte KIA ni shani shagu ngu na gasat gala majan byin nga ai hta madung gaw laknak kaba ni hte gap gasat hkat nga dingyang rai nna, gumshem Myen hpyen ni gaw Jet nbungli ni hte bawm jahkrat bun ai lam galaw nga ai hpe mung chye lu ai.
