Si sum mat ai Munglai Hkyet mungmasha marai (29) a myit dum yawn shawoi akyu hpyi hpawng galaw
Gumshem Myen hpyen dap ni gap dat ai bawm laknak kaba a majaw, si sum mat ai Munglai Hkyet mungmasha marai (29) a myit dum yawn shawoi akyu hpyi hpawng lamang hpe October shata 17 ya shana hkying 3:00pm aten hta Woi Chyai hpyen yen dabang gawknu kaw galaw la lu sai re.
Akyu hpyi hpawng hta Sama Ginwang Amu Madu, Sama Ginwang hpyen yen zinlum Up Hkang komiti Lit Hkam, Rev. Hkalam Gum Hpan Lat kaw nna, n-gun jaw ga tsun ai hta
“Dai ni anhte hkawm ai sa ai hkrum lam, mung shawa ni a padang majan hkrun lam matsing hta anhte Sama Ginwang ni htinggaw shagu rawt malan bungli kaw ntsap ai ni nnga ai, ndai gaw anhte lu gying lu ang ai de sa nga ai hkrum lam hta hkawm ai lahkam ninggam ni hkrai re. Dai ni gade gara hku naw rai ra na kun nchye ai raitim mung, anhte hkawm nga ai hta shawng lam a matu Karai Kasang anhte hte rau re ngu ai hpe myit dum na naw shakut ga” nga nna tsun ai.
Ya aten hta Munglai Hkyet hpyen yen mung shawa ni gaw, Woi Chyai hpyen yen dabang hte Nawng E Hku Nawku jawng wang hta shanu nga ai hta yawng htinggaw (167) re lam chye lu ai.
Dai ni na akyu hpyi hpawng lamang hta KIO ginjaw komiti salang ni, Lit nga ai Magam Dap, Makan Dap na salang ni, NGO ni hte mung shawa ni sa du shang lawm ai lam chye lu ai.
