Manmaw kaw galaw hkyen ai, nlung nnan sha, sut manau poi hpe aten nmasat ai bai htawt sit
Du wa na November shata 23 kaw nna 25 ya du hkra, Manmaw deng 2 Aung Tha kaw galaw hkyen ai, nlung nnan sha sut manau poi hpe October shata 21 ya shani aten nmasat ai bai htawt sit dat sai lam, buga masha ni kaw na chye lu ai.
“Mani hkying 10:00am aten kaw na shana maga hkying 1:00pm jan aten du hkra, manau wang kaw zuphpawng bai galaw ga ai. Ya yang masa nau npyaw ai majaw, manau poi ngu gaw masa pyaw ai shaloi she, wu wu di di rai galaw ai baw re ngu ai hku nna, ginwang Wa Jau ni, Manmaw ginwang hpung up ni, Manmaw JLH ningbaw ni hte sub-komiti ni jawm bawngban nhtawm, aten hpe nmasat ai bai htawt sit dat sai” nga nna zuphpawng kaw shang lawm ai salang langai tsun ai.
Zuphpawng hta Manwin Htunghking Hpung, Munghkawng, Mya Lay, Nmawk, Manje, Manmaw, Chyahkan dap, Amyu shayi ni, ramma ni hte sub komiti ni hkrum zup bawngban da ai hta zuphpawng hpe shata 3 na jang zuphpawng kalang bai galaw na matu myithkrum dawdan da ai lam, salang wa matut tsun ai.
Manmaw Jinghpaw Wunpawng Laili Laika hte Htunghking Hpung kaw nna woi awn let, Manmaw deng (2) Aung Tha kaw, manau wang kapang, naura pa, manau shadung hpaw poi hte (4) lang na nlung nnan sha sut manau poi kaba hpe galaw hkyen ai raitim, masa lam amyu myu a majaw ninghtoi hpe aten nmasat ai bai htawt sit da ai lam rai nga ai hpe chye lu ai.
