Gumshem Myen hpyen ni Mung Maw Buga, nawku jawng wang kaw nbungli bawm wa jahkrat bun
Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra, Mung Maw Buga, Nawku Jawng wang kaw October shata 29 ya jahpawt hkying 9:30am aten daram hta gumshem Myen hpyen ni, Jet Fighter hte bawm wa jahkrat bun ai lam chye lu ai.
Nbungli bawm nawku jawng wang kaw wa hkrat ai majaw, nawku jawng, hpung rung, sara nga ai nta ni htenza mat ai rai nna, masha hkra hkala ai gaw nnga ai lam, ginra masha ni tsun ai kaw na chye lu ai.
October shata 29 ya jahpawt hkying 6:00am aten daram kaw nna, Nam Hai gumshem Myen hpyen dap hpe KIA hpyen hpung ni sa htim gasat ai hpang, Mung Maw mare masha ni gaw, tinang shimlum dum ai shara de hprawng koi yen nga ai lam chye lu ai.
Dai ni October 30 ya shani hta mung, Nam Hai gumshem Myen hpyen dap hpe KIA hpyen hpung ni matut htim gasat nga ai lam, shawng lam na lit nga ai salang ni tsun ai kaw na chye lu ai.
Mungmyit Sinli Ga ginra hta October 27 ya shani kaw nna, Dingdung dap hpawm masum rai nga ai, Kokang MNDAA, TNLA hte AA hpawng hpawm hpyen hpung ni gaw, 1027 hpyen majan masing hpaw nna, gumshem Myen hpyen dap hpe htim gasat hpang nga sai re hpe mung chye lu ai.
