Gumshem Myen hpyen ni Laiza Muklum grup yin shara de laknak kaba gap bun

KIO Ginjaw Ginra, Laiza Muklum grup yin shara de, November shata praw 4 ya shani hkying 10:00am aten daram kaw nna, Hkang Kai Bum, Hpun Pyen Bum, Bumre Bum hte Hka Ya Bum kaw dap jung nga ai gumshem Myen hpyen ni laknak kaba 20 jan lang gap bun ai lam chye lu ai.

Laiza Muklum makau Miwa Nabang hkan de laknak kaba si langai wa hkrat kapaw ai majaw, mungmasha si hkala hkrum ai lam na chye lu ai. Laiza Muklum shara nkau ni hta mung, wa hkrat kapaw ai lam nga ai raitim, masha hkra hkala ai lam nnga ai hpe chye lu ai.

Kagam Bum kaw dap jung nga ai gumshem Myen hpyen ni, November shata praw 3 ya shani hta mung, Mali, Jahta hte Gang Dau makau grup yin de laknak kaba hkrup mara gap shadam bun ai lam nga ai.

Manmaw maga de na hpyen garum lung wa ai gumshem Myen hpyen hpung ni hpe KIA Masat (18) Dap Dung kata na KIA hpyen hpung ni hkap shingla gasat dat ai lam mung nga ai re.

Lai wa sai October shata 31 ya shani kaw nna, gumshem Myen hpyen ni, shani shagu ngu na daram, Laiza makau grup yin shara ni hta Jet Fighter ni hte bawm wa jahkrat bun ai lam nga ai sha n-ga, laknak kaba ni hte mung hkrup mara gap bun nga ai re.

Mungmyit Sinli Ga (Kachin Sub-State), KIA Masat (6) Dap Ba, Masat (9) Dap Dung ginra kaw dap jung nga ai gumshem Myen hpyen dap hpe  November shata praw 3 ya shana maga hkying 3:10am aten daram kaw nna, KIA hpyen hpung ni sa htim gap gasat ai lam chye lu ai.

Gasata poi byin ai hkying hkum 2 na ai hpang dai gumshem Myen hpyen dap hpe gasat zing la lu sai rai nna, hpyen lang arung arai ni hpe mung, padang dip zing la lu ai lam, shawng lam na lit nga ai salang ni shana wa ai kaw na chye lu ai.