Sezin kaw dap jung nga ai gumshem Myen hpyen hte SNA pawng hpawm dap hpe KIA, PDF pawng hpawm hpyen hpung ni sa htim gasat
KIA Masat (9) Dap Ba, Masat (26) Dap Dung ginra, Sezin kaw dap jung nga ai gumshem Myen hpyen hte Sam Hkyeng (SNA) pawng hpawm dap hpe November shata praw 9 ya jahpawt 4:00am aten daram kaw nna, KIA, PDF pawng hpawm hpung ni sa htim gasat ai lam chye lu ai.
Gumshem Myen hpyen hte Sam Hkyeng (SNA) pawng hpawm hpyen hpung ni shara jahkrat ai Sezin mare makau na Tan Yaw Zin Kawng, Shwe Pyi Myint Hkrai Noi hte Shwe Twin lam numbraw mayan na hpyen dap Post 3 hpe KIA, PDF pawng hpawm hpung ni sa htim gasat ai lam, ginra shiga lawk kaw na chye lu ai.
Gasat poi byin ai hpang, Myitkyina kaw na rawt wa ai Jet Fighter 3 hte gasat poi byin ai Sezin maga de bawm sa jahkrat bun ai lam, shawng lam na lit nga ai salang ni kaw na chye lu ai.
KIO ginjaw ginra, Nam San Yang, Lailum Awng Ja maga de mung, hkying 11:30am aten daram hta Myitkyina maga na Jet nbungli 2 hte bawm wa jahkrat bun ai lam nga ai.
Bumre hte Hka Ya Bum kaw nga ai gumshem Myen hpyen dap ni, Laiza makau grup yin shara hte Nam San Yang, Mai Sak Pa maga de gasat poi byin ai lam nnga ai raitim, laknak kaba hkrup mara gap bun nga ding yang re hpe mung chye lu ai.
