Shwegu Ginwang kata gumshem Myen hpyen dap nbungli bawm wa jahkrat bun

KIA Masat (3) Dap Ba, Masat (12) Dap Dung ginra hta November shata 22 ya shani, gumshem Myen hpyen dap ni nbungli bawm wa jahkrat bun ai lam chye lu ai.

Myitkyina kaw na rawt lung wa ai gumshem Myen hpyen dap a nbungli gaw, Shwegu Ginwang kata na Mabing, Mung Leng, Dingyau mare makau na hkau na pa grup yin hta nbungli hte 8 lang bawm wa jahkrat bun ai re lam, lit nga ai salang langai tsun ai.

Ndai zawn bawm wa jahkrat ai ginra mayan hta gasat gala majan byin ai lam mung nnga ai rai nna, KIA ni dap jung shara jahkrat nga ai shara mung nre ai shara kaw, hkrup mara bawm wa jahkrat bun ai re hpe chye lu ai.