KIA hte gumshem Myen hpyen dap lahkawng maga laknak kaba gap bun hkat
KIA Masat (5) Dap Ba, Masat (3) Dap Dung ginra hta KIA hte gumshem Myen hpyen dap ni, November shata 24 ya shani, hkying 1:00pm hte 2:00pm aten laman, lahkawng maga laknak kaba gap bun hkat ai lam chye lu ai.
KIA hpyen hpung ni dap jung nga ai, Law Pum hpyen man kaw nna, gumshem Myen hpyen dap Lagat Kawng de laknak kaba (2) lang gap bun ai hpang, gumshem Myen hpyen dap kawn, KIA hpang de 60mm (7) lang bai nhtang gap bun ai lam, lit nga ai salang ni kaw na chye lu ai.
Matut nna Manmaw kaw dap jung nga ai gumshem Myen hpyen dap, AMT (364) dap ni, Mali Hka sinna hkran KIA Masat 8 Dap Ba, Masat (5) Dap Dung, Kung Hka Mare hte Man Pin Mare shinggan mayan de, November shata 23 ya shani 105mm, 120mm (15) lang gap shadam bun ai lam na chye lu ai.
Ya na zawn KIA hte gumshem Myen hpyen dap, lahkawng maga hpyen masa shaja hkat nga ding yang re majaw, gasat gala majan matut nna byin wa mai ai lam chye lu ai.
