Gumshem Myen hpyen ni hpe KIA ni sa gap gasat

KIO ginjaw ginra, Laja Yang kaw dap jung shara jahkrat nga ai, gumshem Myen hpyen ni hpe, November shata 27 ya shani ka-ang hta KIA hpyen hpung ni sa gap gasat ai lam chye lu ai.

KIA ni sa gap gasat dat ai hpang, Bumre, Hka Ya Bum kaw shara la nga ai gumshem Myen hpyen ni mung, Laja Yang, Laiza makau grup yin, Munglai Hkyet, Mai Sak Pa hte Namsan Yang maga de, laknak kaba (20) lang daram gap bun ai re.

KIO ginjaw ginra, makau grup yin kaw dap jung shara jahkrat nga ai gumshem Myen hpyen dap ni hpe ya aten hta hpyen n gun hte laknak machyu pala ni hpe nbungli hte wa jahkrat ya nga ding yang re lam, shawng lam na lit nga ai salang ni kaw na chye lu ai.

Mungmyit Sinli Ga (Kachin Sub-state), Muse 105 mile ginra hta mung, November shata 27 ya shana maga hkying 5:00pm aten daram kaw nna, gumshem Myen hpyen ni Jet Fighter hte bawm wa jahkrat bun ai majaw, mungshawa ni si hkala hkrum ai sha n-ga dum nta ni mung hten za ma ai lam, ginra masha ni kaw na chye lu ai.