Mungmyit Sinli ginra hta mungshawa ni a sutgan ni hpe gumshem Myen hpyen dap ni mya la nga

Mungmyit Sinli Ga (Kachin Sub-state), Namhpakka ginra hta gumshem Myen hpyen dap ni, mungshawa ni a manu dan ai arung arai hte ja, gumhpraw ni hpe mya la nga ai lam chye lu ai.

Ndai lam hte seng nna ginra masha langai tsun ai hta “Namhpakka mare kaw shim lam la ning wan hkawm ai hpyen hpung ni gaw, dum nta hkan e hkrum mara shang na manu dan ai arung arai, ja rai, gumhpraw, phone ni hpe ma hkra hkrawk la mat wa ai” nga nna tsun ai.

Mungmasa kahtet wa jang marai 20, 30 daram, shani shagu mawdaw lam kaba kaw ning wan hkawm hkawm re, shana de wa mahka rai yang shanhte yu na loi lu na zawn re nta hkan shang rai nta madu ni hpe gaw shinggan kaw shatsap kau shangun nna, manu dan ai arung arai ma hkra la mat wa ya ai lam, ginra wa masha matut tsun ai.

Lam kaba hkan mung cycle jawn ai ni hte hkrum yang jahkring nna, gumhpraw mu yang la kau ya ai lam nga ai hte mungshawa nkau bai hkan tsun jang nkau mi sha bai jaw ai raitim, nta langai mi kaw na gaw, Miwa gumhpraw sen 2 daram la mat wa ya ai lam chye lu ai.

Dai gumshem Myen hpyen dap ni gaw, mare kata shimlam la ai ga baw hte mungshawa ni a arung arai ni hpe mya la nga ai re.

Ndai zawn hpyen masa laja nga ai ten, Namhpakka mare kaw dap jung nga ai gumshem Myen hpyen dap ni mare kata de laknak kaba jahkring hkring gap bun nga ai sha n-ga, dum nta ni hten za hkrum nga ai hte ya na zawn mya la nga ai lam ni hpe mung, mungshawa ni hkrit tsang ra nga ai lam chye lu ai.