Sweet December shana KIO Ginjaw Ginra de gumshem Myen hpyen dap ni laknak kaba gap shadam bun
KIA Ginjaw Ginra, Laiza makau grup yin de Sweet December, November shata 30 ya shana hkying 12:00am aten hta gumshem Myen hpyen dap ni laknak kaba hkrup mara gap shadam bun ai lam nga ai.
Gumshem Myen hpyen dap ni dap jung shara jahkrat nga ai, Hka Ya Bum hte Bumre Bum kaw na, Alen Bum, Mung Lai Hkyet hte KIA Masat (5) Dap Ba makau grup yin de, laknak kaba 10 jan lang daram, gap shadam bun ai lam chye lu ai.
Sweet December shana gaw, hkristan ni a Christmas hkap tau ai nhtoi shana mung rai nga ai hte gumsham Myen hpyen dap ni hku na da sang gap bun ai lam re nga nna, Laiza mungshawa langai tsun ai.
Matut nna KIA ni dap jung shara jahkrat nga ai Dap Ba, Dap Dung shara shagu ngu na daram hta KIA hte gumsham Myen hpyen dap ni gasat gala majan byin nga ai rai nna, Mungmyit Sinli ginra hta mung shani shagu ngu na gasat gala majan byin nga ai re.
