Nawng Gam gumshem Myen hpyen dap hpe KIA ni gasat zing la lu
KIA Masat 8 Dap Ba, Masat (5) Dap Dung hpyen hpung ni, Ja Ngai Yang, Nawng Gam mare kaw dap jung nga ai, gumshem Myen hpyen dap hpe December shata praw 1 ya jahpawt gasat padang dip zing la lu ai lam chye lu ai.
Hkying 6:00am aten kaw na hkying 8:00am aten laman, htim gasat zing madu la lu ai rai nna, dai gumshem Myen hpyen dap ni gaw, Hk.L.Y (10) hte Hk.L.Y (77) kata na ni re lam, lit nga ai salang langai tsun ai.
Ginjaw Ginra hpyen man rai nga ai, Pa Jau Lai Sin grup yin hta mung, December shata praw 1 ya shani gumshem Myen hpyen dap ni nbungli hte bawm wa jahkrat bun ai lam ni nga ai.
Matut nna Manmaw Byuha kawng, gumshem Myen hpyen dap ni kaw na mung, December shata praw 1 ya shana, Mali hkran Kawng Ja makau grup yin maga de, laknak kaba gap shadam bun ai lam ginra masha langai tsun ai.
Gumshem Myen hpyen dap ni gaw, lam shagu hta hkrat sum machyi nga sai re majaw, ya aten mungshawa ni nga ai shara de laknak kaba majoi gap shadam bun nga ai rai nna, KIA hte gumshem Myen dap ni hpyen masa matut shaja hkrat nga ding yang re.
