Mare shinggan de pru hkawm ai mare masha ni hpe gumshem Myen hpyen ni gap sat rim ahkyak la na nga tsun
KIA Masat (1) Dap Ba, Masat (7) Dap Dung ginra kata nga ai mare mungshawa ni hpe Shing Kap bum kaw dap jung nga ai gumshem Myen hpyen dap ni mare shinggan de pru hkawm ai mungshawa kadai hpe raitim, sinat hte gap sat, rim ahkyak la na nga nna tsun da ai lam nga ai hpe chye lu ai.
December shata praw (7) ya shani, Shing Kap bum kaw nga ai gumshem Myen hpyen dap ni mare salang ni hpe shaga la nna, hkying 5:00pm aten kaw na hkying 6:00pm aten laman, mare shinggan de pru hkawm ai mungshawa ni kadai hpe raitim, gap sat rim ahkyak la na ngu salang ni hpe shaga tsun ai lam, lit nga ai salang ni kaw na chye lu ai.
Ndai zawn KIA hte gumshem Myen hpyen dap lapran hpyen masa shaja hkat nga dingyang re majaw, gumshem Myen hpyen dap ni hku na mung mare masha ni hpe lam amyu myu hku jahkrit shama ai lam ni galaw nga ai re.
Matut nna Mungmyit Sinli ginra ni hta mung, shani shagu ngu na gasat gala majan laja lana byin nga ai hte gasat gala majan a majaw lam ni pat mat ai hta malu masha hte jak sau ni nshang mat ai a majaw, Jinghpaw Mung myu mare kata nga ai mungshawa ni lam amyu myu yakhkak hkrum nga ai lam chye lu ai.
