Gumshem Myen hpyen dap ni mungshawa ni hpe n-gu hte mam dut jaw na matu atik anang tsun nga
KIA Masat (5) Dap Ba, Masat (19) Dap Dung ginra rai nga ai, Daw Hpum Yang kaw dap jung shara jahkrat nga ai, gumshem Myen hpyen dap ni dai makau grup yin hkan na mare ni hpe n-gu hte mam dut jaw na matu atik anang tsun nga ai lam chye lu ai.
Daw Hpum Yang gumshem Myen hpyen Hk.L.Y (142) dap ni rai nna, Ban Kawng Mu mare na mungshawa ni hpe n-gu buk (90) hpyi ai hta n-gu buk langai hpe Myen gumhpraw 75000 Kyats hte buk (50) mungshawa ni dut jaw sai lam, ginra masha ni kaw na chye lu ai.
Matut nna Hpa Gyi mare ni hpe mam dang (120) jaw na hku gumshem Myen hpyen dap ni tsun ai kaw dut jaw ai lam nnga shi ai rai nna, Man Wai mare hte Chying Lung mare lahkawng hpe n-gu buk (50) hpra dut jaw na matu matsun ai hta mare lahkawng pawng na n-gu buk mi kaw Myen gumhpraw 75000 Kyats hte buk (50) dut jaw sai lam matut chye lu ai.
Ndai zawn gumshem Myen hpyen dap ni n-gu hte mam ni hpe mari nga ai lam gaw, Mandalay, Myitkyina, Manmaw lam kaba pat mat ai hta Manmaw lam kaba ntsa dap jung shara jahkrat nga ai, gumshem Myen hpyen dap ni malu masha yakhkak nga ai re majaw, mungshawa ni kaw na atik anang mari nga ai re lam chye lu ai.
