Gumshem Myen hpyen dap npu na, Pyi Tu Tsit ni nga ai shara 2 hpe KIA pawng hpawm hpyen hpung ni sa htim gasat zing
Gumshem Myen hpyen dap npu na Pyi Tu Tsi ni shara jahkrat nga ai Da Law Gyi hte Baw Sa Di shara 2 hpe, December shata 15 ya jahpawt KIA pawng hpawm hpyen hpung ni sa htim gasat zing la lu ai lam chye lu ai.
Ndai Pyi Tu Tsit hpyen hpung ni gaw, ginra mungshawa masha ni hte lai wa lai sa mungmasha ni hpe jahkrit shama shagyeng shakat dingbai dingna jaw ai ni re lam, ginra masha ni tsun ai.
Gasat poi byin ai hpang Da Law Gyi maga de, Myitkyina kaw na Jet Fighter 2, Helicopter 1 hte numdaw 2 lang jak sinat rocket bawm hte sa gap gasat ai sha n-ga, KIO ginjaw ginra, Bumre, Hka Ya Bum kaw nga ai gumshem Myen hpyen ni mung, Munglai Hkyet, Nam San Yang maga de laknak kaba hkrup mara gap bun ai lam nga ai rai nna, Mai Sak Pa mare de Jet nbungli hte bawm wa jahkrat bun ai majaw, mungshawa marai langai bawm hkyep hkra hkala ai lam na chye lu ai.
KIA Masat (5) Dap Ba Masat (19) Dap Dung ginra, Dingga Hka La Yang mayan kaw mung, December shata 15 ya jahpawt hkying 10:00am aten hta Bumre Hka Ya Bum de, hpyen lang arung arai hte malu masha wa htaw sa ya na modo ni hpe shimlam la ya na matu nga taw ai gumshem Myen hpyen hpung ni hpe KIA pawng hpawm hpyen hpung ni hkap gap gasat ai rai nna, ndai shara kaw December shata 13 ya shani kaw nna gasat poi byin nga sai re.
Dai ni December shata 15 ya shani hkying 11:00am aten daram hta mung, KIA Masat (3) Dap Ba ginra, Yaw Yung Bum kaw dap jung nga ai gumshem Myen hpyen dap ni, Mai Ja Yang Muklum maga de laknak kaba 3 lang gap bun dat ai majaw, dum nta langai hten mat ai sha n-ga, mungshawa marai 2 pala hkyep hkra hkala ai raitim, grai tsang ra ai madang nnga ai lam, ginra masha ni tsun ai kaw na chye lu ai.
