Hugawng ginra hte Waimaw ginra ni hta mam dan ten lai tim mam nlu dan la ai sha mayak hkrum nga

Hugawng Danai ginra hte Waimaw ginra ni hta mam dan jak hte bungli galaw na masha nnga ma ai majaw, mam dan ten lai tim mam nlu dan la hkraw ai sha yakhkak hkrum nga ai lam chye lu ai.

Lai wa sai shaning ni hta Myen mung lawu ga na bungli galaw masha ni law malawng bungli wa galaw ai masha law ai raitim, ya aten mam dan jak hte bungli galaw masha nnga ma ai majaw, mayak hkrum nga ai re lam ginra masha ni kaw na chye lu ai.

Shaning shagu bungli galaw masha ni hte sha bungli galaw wa ai raitim, ya aten bungli galaw masha nnga mat wa ai majaw, hkau na galaw sha ai mungshawa ni aten dep mam nlu dan zing la ai sha mam ni min lai nna sum machyi hkrum ai lam chye lu ai.

Mare hte tsan ai sara hta grau nna yakhkak ai lam ni nga ai, lani mi Myen gumhpraw 10000 kyats hte bungli galaw shabrai jaw ai raitim, bungli galaw masha ni manu manat ai n-ga, tsan yang tsan ai hku lani mi 25000 kyats daram jaw ra ai re nga nna, Waimaw ginra masha langai tsun ai.

Matut nna Hugawng Danai ginra ni hta hkau na galaw ai masha ni law ai rai nna, shaning shagu mam sharun jak hte sha mam dan la ai raitim, dai ning gaw mam dan jak ni nnga ma sai majaw, shada da la hkat nna langai ngut jang langai bai sharun la rai, yakhkak hkrum nga ai re lam matut chye lu ai.

Ya na zawn hkau na galaw sha ai mungshawa ni yakhkak hkrum ai lam gaw, mung masa hpyen masa a majaw bungli galaw masha ni lai wa sai shaning na zawn, bungli tam galaw sha na mung hkrit tsang ra nga ai hte hkrun lam ni pat ai majaw bungli galaw masha nnga mat wa ai re lam chye lu ai.