123 gumshem Myen hpyen dap hpe KIA ni htim gasat nga

Mungmyit Sinli Ga (Kachin Sub-state) ginra, Namhpaka kaw dap jung shara jahkrat nga ai, 123 gumshem Myen hpyen dap hpe KIA pawng hpawm hpyen hpung ni htim gasat nga ai lam chye lu ai.

December shata 29 ya jahpawt hkying 6:00am aten daram kaw na, KIA Masat (4, 6, 10) Dap Ba kata na pawng hpawm hpyen hpung ni, 123 gumshem Myen hpyen dap hpe htim gasat nga ai re lam, ginra shi sawk langai tsun ai.

KIA pawng hpawm hpyen hpung ni htim gasat nga ai ten, gumshem Myen hpyen dap Jet Fighter hte 3 lang wa gap bun nna, Y-12 nbungli hte mung numdaw 10 lang bawm wa jahkrat bun nhtawm, hpyen masa shaja hkat nga ding yang re lam, ginra shi sawk wa matut tsun ai.

Ya aten Jinghpaw Mung, Mungmyit Sinli Ga ginra ni hta KIA hte gumshem Myen hpyen dap lapran gasat gala majan matut manoi byin nga ai rai nna, lahkawng maga hpyen masa shaja hkat nga ding yang re lam chye lu ai.