KIA Masat (252) Dap Nawng Dap Dung ginra hta gasat gala majan byin
KIA Masat (1) Dap Nawng Daju, Masat (252) Dap Nawng Dap Dung ginra hta January shata praw 3 ya shana maga hkying 2:58pm aten daram hta KIA hte gumshem Myen hpyen dap ni gasat gala majan byin ai lam chye lu ai.
Shani hkying 11:50am aten laman hta Myitkyina kaw na Na Hpaw maga de malu masha wa jahkrat ai gumshem Myen hpyen dap Helicopter nbungli langai hpe KIA ni gap jahkrat kapaw kau ya ai hpang, Na Hpaw maga kaw na yu wa ai gumshem Myen hpyen dap ni hte shana maga hkying 2:58pm aten daram hta gasat gala majan matut byin ai lam, lit nga ai salang langai tsun ai.
Na Hpaw maga kaw na yu wa ai gumshem Myen hpyen dap, hpyen n-gun (40) daram lawm ai hpyen hpung hpe KIA Masat (252) Dap Nawng Dap Dung hpyen hpung ni, U Law Kawng hte Na Hpaw lapran kaw bawm hte hkap kapaw bun ai kaw na, lahkawng maga gasat gala majan byin wa ai lam, salang wa matut tsun ai.
Myitkyina kaw na modo (4) hte rawt lung wa ai, Salang. Shwe Min (P.T.Ts) hpung ni gaw, Nlung Hka mahkrai kaw dap jung nga ai shanhte a P.T.Ts dap kaw, January shata praw 2 ya shani Awng Mye Tit mare na mungshawa ni hpe shaga la rai nna, zuphpawng woi galaw ai lam chye lu ai.
Dai zuphpawng hta Lisu htinggaw (1) hta marai langai P.T.Ts galaw ra na hte makam masham hpung woi sara ni mung, P.T.Ts galaw ra na lam, zuphpawng hta tsun ai hpe, ginra masha ni kaw na chye lu ai.
