Gwihka gumshem Myen hpyen dap hpe KIA ni gasat zing madu la
Hpakant Gwihka gumshem Myen hpyen dap hpe KIA pawng hpawm hpyen hpung ni January shata 20 ya jahpawt hkying 4:30am aten daram hta zing madu la lu sai lam chye lu ai.
Gwihka Hk.M.Y (42) gumshem Myen hpyen dap hpe KIA pawng hpawm hpyen hpung ni January shata 18 ya shani kaw na numdaw mi bai htim gasat ai hta January shata 20 ya jahpawt hkying 4:30am aten daram hta gasat zing madu la lu sai lam, lit nga ai salang langai tsun ai.
KIA pawng hpawm hpyen hpung ni lai wa sai January shata praw 6 ya shani kaw na htim gasat nga ai hta Myen hpyen dap ni nbungli hte wa gap bun ai lam ni nga ai rai nna, January shata 18 ya shani kaw na numdaw kalang bai htim gasat ai hta zing madu la lu ai re lam, salang wa matut tsun ai.
Gwihka Myen hpyen dap hta hpyen n-gun 100 daram nga ai rai nna, KIA Masat (9) Dap Ba, Masat (6) Dap Dung kata na pawng hpawm hpyen hpung ni htim gasat zing madu la ai re lam chye lu ai.
Ndai zawn KIA hte gumshem Myen hpyen dap ni gasat gala majan byin ai majaw, dai ginra hta nga ai mungshawa ni hpyen koi yen nga ra ai re lam chye lu ai.
