Katsu hte Dabak mare masha ni kalang bai hpyen hprawng koi yen nga

Waimaw hte Laiza lam kaba ntsa, gumshem Myen hpyen dap hte KIA ni gasat gala majan matut byin nga ai hte lahkawng maga laknak kaba gap bun hkat nga ai majaw, Katsu, Dabak hkan na mare masha ni kalang bai hprawng koi yen nga ra ai re lam chye lu ai.

Katsu mare gumshem Myen hpyen dap kaw n-gun bai jat lung wa ai hpyen n-gun 100 daram, Sama lam numshe de htu shadut nga ai majaw, KIA hte gasat gala majan byin nga ai sha n-ga, lahkawng maga laknak kaba ni hte gap bun hkat nga ai hta mare masha ni hprawng koi yen nga ra ai re lam, ginra masha ni kaw na chye lu ai.

Lai wa sai January shata 19 ya shani kaw nna 22 ya shani du hkra, KIA hte gumshem Myen hpyen dap ni gasat gala majan byin nga ai hte lahkawng maga laknak kaba gap bun hkat nga ai re hpe chye lu ai.

Ndai zawn lahkawng maga hpyen masa shaja hkat nga ai majaw, dai mare hta nga ai hpaji jawng ni hpe January shata 19 ya shani kaw na pat kau ai rai nna, mare masha ni shimlum ai shara de hprawng koi yen nga ai re lam chye lu ai.

Ga Ra Yang, Katsu hte Dabak mare mungshawa ni gaw lai wa sai, 2011 ning KIA hte gumshem Myen hpyen dap lapran gasat gala majan bai byin wa ai hta hpyen hprawng koi yen nga ai ni rai nna, 2023 ning kaw na mare buga de bai wa nga ai ni re lam chye lu ai.