Manmaw Muklum kata gumshem Myen hpyen dap ni masha rim lahkawn nga

Manmaw Muklum kata gumshem Myen hpyen dap ni January shata 24 ya shana daw hkying 5:00pm aten daram kaw na, masha rim lahkawn nga ai lam chye lu ai.

Muklum kata masha htant ai shara ni hta laiwa laisa mungshawa yawng hpe asak kaji kaba n lata ai, num la yawng, cycle, modo hte re ni hpe cycle modo zing kau ya nna, phone lawm ai ni hpe matut mahkai nlu na matu phone zing kau ya rai, mu ai masha yawng hpe rim lahkawn nga ai, nga nna ginra masha langai tsun ai.

Masha yawng marai 100 daram hpe rim lahkawn mat wa sai rai nna, cycle (80) daram hte modo ni hpe mung rim da ai sha n-ga, dai rim lahkawn da ai ni hpe gara de woi mat wa ai, hpa majaw rim lahkawn ai nchye lu ai nga nna, ginra masha matut tsun ai.

Ya na zawn rim lahkawn nga ai majaw, Manmaw Muklum kata nga ai mungshawa ni hkrit tsang nga ai rai nna, lam ntsa de mungshawa pru hkawm ai lam nnga mat ai hte gat seng ni yawng ngu na mung pat tawn da ra ai re lam chye lu ai.