Gumshem Myen hpyen dap ni mung shawa ni a manu dan ai arung arai hte ja, gumhpraw ni hpe myala mat wa
Hpakant Ginwang, KIA Masat (9) Dap Ba, Masat (6) Dap Dung ginra, Nam Jan mare na mungshawa ni a manu dan ai arung arai hte ja, gumhpraw ni hpe myala mat wa ya ai sha n-ga, mare masha ni hpe mung rim woi mat wa ai re lam na chye lu ai.
February shata praw 7 ya shani hkying 11:00am aten daram hta Tung Fung modo (1), Landcruiser modo (1) hte Kluger modo (1) hte sa wa ai hpung ni, Nam Jan (2) mare na mungshawa marai (6-7) daram hpe rim woi mat wa nna, mung shawa ni a dum nta hkan shang mya ai hta Slg. Maung Ta hte Jan. Ja Ing yan a Lata chyawp (1), phone (1), gumhpraw sen masum, Slg. Phoe Ta a phone (1) hte gumhpraw mun mali hpe la mat wa ya ai lam, ginra masha ni kaw na chye lu ai.
Rim woi mat wa ai mung mare masha ni hpe gaw, Sha-it Yang mare, Me Ti La jawng kaw hkying 11:30am hte hkying 12:19pm aten laman hta yawng hpe bai dat ya sai lam, ginra masha ni kaw na matut chye lu ai.
Ya na zawn myalu myala hkawm ai hpung ni gaw, Hk.M.Y (120) gumshem Myen hpyen dap hte Hk.L.Y (76) dap na shimlam la ai pawng hpawm hpyen hpung ni re lam chye lu ai.
Matut nna dai gumshem Myen hpyen hpung ni hpyen n-gun (20) daram, Tung Fung modo (1) hte Kluger modo (1) kaw htawt jawn nhtawm, Hpakant Tatma kawng de bai wa mat ai lam matut chye lu ai.
