Namhpaka mungshawa ni hpe mare kata wa nga mai sai lam, seng ang ai salang ni tsun
Namhpaka mare kata lai wa sai ten, KIA hte gumshem Myen hpyen dap ni gasat gala majan byin ai majaw, hpyen koi yen nga ai mungshawa ni hpe ya aten mare kata wa nga mai sai lam, seng ang ai salang ni tsun ai kaw na chye lu ai.
Lai wa sai 2023 ning December shata kaw nna, Namhpaka mare kata KIA hte gumshem Myen hpyen dap lapran laja lana gasat gala majan byin ai a majaw, dai mare na mungshawa ni hpyen koi yen nga ai hta 2024 ning January shata 30 ya shani kaw na mare kata bai wa nga mai sai lam, lit nga ai salang ni kaw na chye lu ai.
Namhpaka mare kata majan a majaw, mungshawa ni a dum nta law law hten za hkrum ai hte mungmasha si, hkala ai lam ni mung nga ai rai nna, hten za mat ai dum nta ni hpe buga hpung woi sara ni, hpung masha ni kaw na jasan jaseng ai lam galaw hpang nga sai hte mare masha nkau wa nga magang sai lam chye lu ai.
Majan byin ai laman asak si sum mat ai mungshawa yawng marai (19) nga ai hta machyi hkala hkrum ai masha marai (15), hten za mat ai dum nta (850) jan rai nna, hten za hkrum ai dum nta hpe gumhpraw hku na nga yang (sen mun sanit) jan ram ang nhtawm, shawa hte seng ai, nawku jawng, hpaji jawng, tsi rung, gat, hpungkyi jawng ni a jahpan nlawm shi ai lam matut chye lu ai.
