Hpakant ginra gasat gala majan matut byin nga
KIA Masat (9) Da Ba, Masat (6) Dap Dung ginra, Hpakant Ginwang, gumshem Myen hpyen dap Hk.L.Y (76), Hk.M.Y (12) hte laksan Masat (4) Myen balik dap hte KIA ni gasat gala majan byin ai lam chye lu ai.
February shata 12 ya jahpawt hkying 7:00am aten daram hta machyi hkala masha lawm ai, gumshem Myen hpyen hpung ni n-gun (50) daram, Tung Fung modo (1), Kluger modo (1) hte rawt wa ai hpe KIA ni Hpakant lam Lungbra mare baw kaw hkap gap ai kawn, gasat gala majan byin wa ai lam, lit nga ai salang langai tsun ai.
Hkying 10:00am hte hkying 11:00am aten laman hta mung, lagaw lam hte lung wa ai gumshem Myen hpyen hpung hpe KIA ni Lawa Tsin Tawng lapran, Lungbra mare pyen dau makau kaw hkap gap ai kaw na gasat gala majan matut byin wa ai lam, salang wa matut tsun ai.
Gasat gala majan byin nga ai ten, Hpakant tatma kawng kaw nga ai gumshem Myen hpyen dap Hk.L.Y (76) dap ni 120mm gap bun nna, Ginsi tatyin kawng kaw nga ai, Hk.M.Y (11) dap ni mung, Mile (8) mare lapran de 120mm (2) lang gap bun ai lam chye lu ai.
Matut nna hkying 12:40pm aten daram hta Myitkyina kaw na rawt wa ai, Jet Fighter (2), Hpakant lam Mile (7-8) mare lapran kaw Machin gun hte shawng wa gap gayin nna, bawm (2) lang wa jahkrat nhtawm, Nam Yung mare makau kaw bawm (1) wa jahkrat kau da ai lam matut chye lu ai.
Hpakant ginra hta ya aten KIA hte gumshem Myen hpyen dap lapran hpyen masa shaja hkat nga ai rai nna, gasat gala majan mung laja lana matut byin nga ai lam chye lu ai.
