Hpakant ginra masha ni hpe KIA hpyenla a lam gumshem Myen hpyen dap ni san jep nga
KIA Masat (9) Dap Ba, Masat (6) Dap Dung, Hpakant ginra hta ginra masha ni hpe shaga la rai nna, KIA hpyenla a lam gumshem Myen hpyen dap ni san jep sagawn nga ai hpe chye lu ai.
February shata (14) ya shani Le Pyin Bawm Yam gumshem Myen hpyen dap Hk.L.Y (76) hte Laksan Masat (4) Myen balik dap pawng hpawm hpyen hpung ni, laiwa laisa ginra masha ni hpe shaga la rai nna, KIA hpyenla ni a lam, san jep sagawn nga ai hpe ginra masha ni kaw na chye lu ai.
Ya na zawn san jep sagawn ai gaw lai wa sai February 11 ya shani kaw nna, Le Pyin Bawm Yam gumshem Myen hpyen dap Hk.L.Y (76), Laksan Masat (4) Myen balik dap hte KIA ni gasat gala majan byin nga ai re majaw, san jep sagawn nga ai re hpe chye lu ai.
KIA Masat (1) Dap Nawng Daju, Masat (254) Dap Nawng Dap Dung ginra hta mung, February shata 13 ya shani KIA hpyen hpung ni Bak Nan Yang mare makau grup yin hta kawp gawan hkawm nga yang, gumshem Myen hpyen dap n-gun (10) jan hte ang katut gasat gala majan byin ai re lam, lit nga ai salang langai tsun ai.
Gasat gala majan byin nga yang Katsu kaw dap jung nga ai, gumshem Myen hpyen dap ni gasat gala majan byin ai shara de laknak kaba (3) lang gap bun ai lam chye lu ai.
Matut nna Ginjaw Ginra rai nga ai, Bumre hte Hpun Pyen Bum kaw dap jung nga ai, gumshem Myen hpyen dap ni, Madi Yang hte Awng Ja maga de laknak kaba (8) lang gap shadam bun ai hta KIA ni hpang maga na mung, Hpun Pyen Bum maga de laknak kaba bai nhtang gap bun ai lam matut chye lu ai.
