Manje Muklum kata gumshem Myen hpyen dap ni laknak kaba hkrup mara gap bun
KIA Msat (3) Dap Ba, Masat (1) Dap Dung ginra, Manje Muklum kata, gumshem Myen hpyen dap ni laknak kaba hkrup mara gap bun ai lam chye lu ai.
February shata 16 ya shana hkying 7:30pm aten kawn, hkying 12:00am jan hkra, gumshem Myen hpyen dap Hk.L.Y (47), Hk.M.Y (319) hte Hk.M.Y (601) lapran na laknak kaba dap ni, Manje Muklum kata laknak kaba (20) jan lang gap bun ai hta Muklum kata (10) lang wa hkrat kapaw ai lam, ginra masha langai tsun ai.
“Mungmasha ni hkrit kajawng nga ma ai, gara de nchye hprawng, hprawng na nga yang mung ja gumhpraw ra ai, ja gumhpraw nlu ai majaw dai hku gayin nga ai ga rai sai, Min Aung Hlaing a hpyenla ni grai n kaja ma ai, mungmasha re chye nga ninglen gap ai, Min Aung Hlaing wa gaw chye nga kun, nchye masu su ai kun, chye nga ninglen dingsang di shangun ai re kun” nga nna ginra masha langai tsun ai.
Laknak kaba wa hkrat kapaw ai majaw, Slg. Hkangje La Aawng a nta hten mat ai hte madu jan a lahpa kaw hkra hkala la ai rai nna, Slg. Zau Lai, Slg. So Te, Sara Yaw La, KBC Nawku jawng wang nta ni hten mat nhtawm, Slg. Sumlut Naw Ja a dum su langai si mat ai lam chye lu ai.
Mungshawa ni a dum nta ni hten mat ai hte du sat yam nga si sum mat ai hpe gumhpraw hku na sawn ga nga yang sen 700 daram hkrat ang ai re lam chye lu ai.
