Je Hkam ginra, KIA hte gumshem Myen hpyen dap gasat gala majan byin nga

KIA Masat (3) Dap Ba, Masat (12) Dap Dung ginra, Shwegu Ginwang Je Hkam ginra hta KIA hte gumshem Myen hpyen dap ni gasat gala majan byin nga ai lam chye lu ai.

February shata 17 ya jahpawt hkying 6:00am aten kaw nna, gumshem Myen hpyen dap Hk.L.Y/ Hk.M.Y (15, 223, 121, 276) dap hte KIA ni Je Hkam ginra hta gasat gala majan byin nga ai lam, lit nga ai salang langai tsun ai.

Gasat gala majan byin nga ai ten, hkying 9:00am aten daram hta gumshem Myen hpyen dap Jet Fighter (2) hte bawm wa jahkrat bun ai lam matut chye lu ai.

Matut nna Gawng Run mare, Hka Jin mare hte Mun Sinn mare ni hta KIA ni nga na shadu ai majaw, shana yup tung hkying 1:00am aten kawn, hkying 6:00am aten du hkra, nbungli hte bawm wa jahkrat bun ai lam chye lu ai.

Ya aten gumshem Myen hpyen dap ni gaw lam amyu myu hku sum machyi nga sai majaw, mungshawa ni nga ai mare, shara ni hta nbungli bawm, laknak kaba ni hte hkrup mara gap shadam bun nga ai re.