Hpyen n-gun htu lung wa ai gumshem Myen hpyen ni, Katsu mare kaw shara la nga
Waimaw, Laiza lam kaba ntsa hpyen n-gun htu lung wa ai, gumshem Myen hpyen hpung ni, Katsu mare kaw shara la wa nga taw ai lam chye lu ai.
Katsu mare, Sama Ginwang Rung kaw February shata 22 ya shani hkying 10:00am aten daram hta gumshem Myen hpyen n-gun 200 daram hpung ni shara la wa nga taw ai majaw, mare masha ni hkrit tsang nga ai hte kaga shara de hprawng koi yen nga ra ai re lam, ginra masha ni kaw na chye lu ai.
Katsu mare gaw lai wa sai 2011 ning hta KIA hte gumshem Myen hpyen dap lapran, gasat gala majan kalang bai byin wa ai majaw, mare masha ni (10) ning jan hpyen koi yen mat ai hta, 2023 ning March shata kaw na mare kata bai wa nga hpang ai re.
Gumshem Myen hpyen dap ni lai wa sai 2023 shaning htum wa maga kaw na, Sama maga de hpyen n-gun htu shadut nga ai rai nna, KIA hte gasat gala majan matut byin nga ai re lam chye lu ai.
Ya na zawn gumshem Myen hpyen dap ni hpyen shamu shamawt nga ai sha n-ga, Myen mung kata nga ai asak aprat naw ram ai ramma, wa ja ni hpe hpyenla nla nmai ladat hku na hpyen rim lahkawn taw nga ai lam matut chye lu ai.
