KIA Masat (5) Dap Ba ginra gasat gala majan byin
KIA Masat (5) Dap Ba, Masat (3) Dap Dung ginra, Katsu gumshem Myen hpyen dap kaw nna, shimlam la shamu shamawt nga ai, gumshem Myen hpyen dap hte KIA ni gasat gala majan byin ai lam chye lu ai.
February shata 22 ya shani hkying 10:20am aten daram hta Ga Ra Yang hte Lung Zep Kawng lapran shimlam la shamu shamawt nga ai, gumshem Myen hpyen dap n-gun (30) daram hpe KIA ni hkap gap ai kawn, gasat gala majan byin wa ai lam, lit nga ai salang langai tsun ai.
Masat (18) Dap Dung ginra hta mung, Laja Yang maga kaw nna yu wa ai gumshem Myen hpyen Hk.M.Y (416) dap hte KIA ni gasat gala majan byin ai lam chye lu ai.
Hkying 11:35am aten daram hta Laja Yang maga na yu wa ai, Hk.M.Y (416) gumshem Myen hpyen dap n-gun (40) daram kaw nna, n-gun (10) daram, Ting Jang mare makau, Munglai Hka rap nga ai ten KIA ni hkap gap ai kawn gasat gala majan byin wa ai lam, salang wa matut tsun ai.
Ya aten KIA hte gumshem Myen hpyen dap lapran hpyen masa shaja hkat nga ding yang rai nna, gasat gala majan mung matut manoi byin wa mai ai lam chye lu ai.
