Tamahkan Myen dap hpe KIA ni htim gasat nga
Hpakant, KIA Masat (9) Dap Ba, Masat (6) Dap Dung ginra, Tamahkan gumshem Myen hpyen dap hpe KIA ni htim gasat nga ai lam chye lu ai.
February shata 26 ya shana maga hkying 4:20pm aten daram kaw na, Tamahkan gumshem Myen hpyen Hk.M.Y (119) dap hte Myen balik dap hpe KIA, K-PDF pawng hpawm hpyen hpung ni htim gasat nga ai lam, lit nga ai salang langai tsun ai.
Gasat gala majan byin nga ai ten, hkying 5:30pm aten daram hta Myitkyina kaw nna rawt wa ai, Jet Fighter (1) hte bawm wa jahkrat bun ai rai nna, Hpakant Byuha kawng kaw na mung laknak kaba gap garum ya ai lam, salang wa matut tsun ai.
Shana maga hkying 6:00pm aten daram hta Myen balik dap hpe gasat zing la lu sai rai nna, Hk.M.Y (119) gumshem Myen dap hpe matut naw htim gasat nga ai lam chye lu ai.
Gasat gala majan byin ai ten, Hpakant Byuha kawng kaw na gumshem Myen hpyen dap ni laknak kaba hkrup mara gap bun ai majaw, Tamahkan mare masha ni a nta nkau hten za mat ai hte mare masha ni koi yen nga ra ai re lam chye lu ai.
Matut nna mung, KIA Masat 8 Dap Ba ginra, Sin Bu gumshem Myen hpyen dap hpe KIA pawng hpawm hpyen hpung ni, matut naw htim gasat nga ai lam chye lu ai.
