Man Je Muklum kata gumshem Myen hpyen dap ni laknak kaba matut gap bun nga
KIA Masat (3) Dap Ba, Masat (1) Dap Dung ginra, Nba Pa Ginwang, Man Je Muklum kata gumshem Myen hpyen dap ni laknak kaba matut gap bun nga ai lam chye lu ai.
February shata 28 ya shana hkying 7:00pm aten kaw na, hkying 9:00pm aten daram du hkra, gumshem Myen hpyen dap Hk.M.Y (319) hte Hk.M.Y (601) lapran na laknak kaba dap ni gap bun ai re lam, ginra masha langai tsun ai.
Numdaw 3 lang gap ai, hkring la na gap gap re, kalang gap yang ding yang gap ma ai, 10 jan lang gap ai hta law malawng gaw mare kata de hkrat kapaw ai, nga nna ginra masha matut tsun ai.
Laknak kaba hkrat kapaw ai hta asak 11 ning re jawngma la kasha langai hkra hkala ai rai nna, Salang. Chyauhpa Tang a mamdum hte Salang. Kyaw Lwi a nta hten za mat ai lam chye lu ai.
Gumshem Myen hpyen dap ni lai wa sai February shata 16 ya shani kaw nna, Man Je Muklum kata laknak kaba hkrup mara gap shadam bun nga ai hta mungshawa si, hkala ai lam nga wa sai hte dum nta ni hten za hkrum ai lam, law law nga wa sai hpe chye lu ai.
