Ginjaw Ginra kata gasat gala majan laja lana matut manoi byin

Ginjaw Ginra kata KIA hte gumshem Myen hpyen dap lapran gasat gala majan laja lana matut manoi byin nga ai lam chye lu ai.

Ginjaw Ginra, Waimaw Laiza lam hte Manmaw Laiza lam kaba ntsa dap jung shara jahkrat nga ai, gumshem Myen hpyen dap shara ni hpe KIA pawng hpawm hpyen hpung ni March shata praw 7 ya shani kaw na htim gasat nga ai re.

KIA ni htim gasat nga ai hta Pan Tsun, Gawkngu, Hkala Kadawng, Laja Yang Masen Kawng, Hka Ya Bum hte Hkang Gai Bum gumshem Myen hpyen dap hte post nkau ni hpe padang dip la lu sai rai nna, ngam nga ai hpyen dap shara ni hpe matut htim gasat nga ai lam chye lu ai.

Gasat gala majan laja lana byin nga ai hta gumshem Myen hpyen dap ni nbungli bawm shani shagu wa jahkrat bun nga ai sha n-ga, laknak kaba ni hte mung hkrup mara gap shadam bun nga ai lam chye lu ai.

KIA hte gumshem Myen hpyen dap lapran gasat gala majan matut manoi byin nga ai hta gumshem Myen hpyen dap nbungli, laknak kaba ni hte mungshawa ni nga ai de hkrup mara gap bun nga ai majaw, Ginjaw Ginra kata nga ai hpyen yen mungshawa ni shim lum ai shara de koi yen nga ai hpe chye lu ai.