Sinlum Myen dap hpe KIA ni htim gasat zing la
KIA Masat (3) Dap Ba ginra Sinlum gumshem Myen hpyen dap hpe KIA ni htim gasat zing madu la lu sai lam chye lu ai.
April shata praw 1 ya jahpawt hkying 7:00am aten daram hta Manmaw, Loi Je lam kaba ntsa, Sinlum Byuha gumshem Myen hpyen dap hpe KIA ni padang dip la lu sai lam, lit nga ai salang ni kaw na chye lu ai.
KIA pawng hpawm hpyen hpung ni htim gasat nga ai hta March shata 31 ya shana yup tung hkying 1:12am aten daram hta gumshem Myen hpyen dap nbungli bawm wa jahkrat bun ai kaw, Nba Pa Ginwang, Jan Mai mare ka-ang kaw wa hkrat kapaw ai majaw, dum nta ni hten za mat ai hte modo la marai 5 asak si sum nna marai 3 hkala hkrum ai lam, ginra masha langai tsun ai.
Nmawk, Loi Je mado lam grup yin ni hta dap jung shara jahkrat nga ai, gumshem Myen hpyen dap ni hpe KIA pawng hpawm hpyen hpung ni lai wa sai March shata 27 ya shani kaw na htim gasat hpang wa ai hta gumshem Myen hpyen dap nkau hpe padang dip la lu sai rai nna, ngam ai hpyen dap nkau hpe matut htim gasat nga ai lam chye lu ai.
