Gumshem Myen hpyen dap ni, Jet Fighter hte bawm wa jahkrat bun
KIA Masat (5) Dap Ba, Masat (3) Dap Dung ginra, Nang Zaw, Wa Shaga Bum mayan de, April shata praw 7 ya shani ka-ang hkying 12:00noon aten daram hta gumshem Myen hpyen ni, Jet Fighter langai hte numdaw 3 lang bawm jahkrat bun nhtawm, rocket hte mung gap bun ai lam chye lu ai.
Ndai Nang Zaw Wa Shaga Bum mayan de, gasat poi byin ai lam nnga ai raitim, gumshem Myen hpyen dap gaw, ndai zawn nbungli kawn bawm jahkrat bun ai re lam, ginra masha ni tsun ai.
Dai ni April shata praw 7 ya shani hta Waimaw kaw dap jung nga ai, Hk.L.Y (58) gumshem Myen hpyen dap kaw nna, makau grup yin shara de, laknak kaba hkrup mara gap bun ai hta Lamyang mare kaw pala si langai wa hkrat kapaw ai majaw, mungshawa langai hkra hkala ai lam chye lu ai.
Gumshem Myen hpyen ni gap dat ai laknak kaba pala si langai Lamyang mare na salang Maran Brang Seng a nta kaw wa hkrat kapaw ai majaw, kasha saranum Maran Seng Hkawn Asak (24) ning, la pai lagaw labawp hte magyi kaw pala hkyep wa hkra hkala ai sha n-ga, modo kaji langai mung pat ga, modo leng ni baw mat ai lam chye lu ai.
Waimaw Chyum Jawng wang makau hta mung, gumshem Myen hpyen ni gap dat ai laknak kaba pala si langai wa hkrat kapaw ai majaw, wan hkru wa ai hpe buga masha ni sa sat nga ai lam, ginra shiga lawk kaw na chye lu ai.
