Loi Je Myen dap hpe KIA ni padang dip la
KIA Masat (3) Dap Ba ginra, Loi Je gumshem Myen hpyen dap hpe KIA ni padang dip la lu sai lam chye lu ai.
April shata praw 9 ya jahpawt, Loi Je gumshem Myen hpyen Hk.L.Y (142) dap hpe KIA pawng hpawm hpyen hpung ni padang dip la lu sai rai nna, ginra jasan ai lam galaw nga ai hpe lit nga salang langai tsun ai.
Loi Je gumshem Myen hpyen dap kata na hpyenla ni hprawng pru mat wa ai majaw, gasat gala majan nbyin ai sha KIA ni padang dip la lu ai re lam chye lu ai.
Padang dip la lu ai hta hpyen lang arung arai, laknak arung arai ni rai nna, Loi Je kata nga ai gumshem Myen hpyen dap npu na rung, balik dap ni yawng hpe KIA ni April shata praw 4 ya shani padang dip la lu sai re lam chye lu ai.
Nmawk, Loi Je lam ntsa dap jung nga ai gumshem Myen hpyen dap shara ni hpe KIA ni lai wa sai March shata 27 ya shani kaw na htim gasat hpang wa ai hta Myen dap kaba shara nkau hpe padang dip la lu sai rai nna, KIA Masat (3) Dap Ba ginra KIA hte gumshem Myen hpyen dap lapran hpyen masa matut naw shaja hkat nga ai hpe chye lu ai.
