Mungshawa marai (5) hpe gumshem Myen hpyen dap ni rim woi mat

Myitkyina lawu Mawhpawng hta RCM hpung magam gun marai (2) hte KBC hpung magam gun marai (3) hpe gumshem Myen hpyen dap ni rim woi mat wa ai lam chye lu ai.

April shata 20 ya shana hkying 10:30pm aten daram hta lawu Mawhpawng RCM nawku jawng na hpung magam gun, Sara. Lungbang Hkaw Htang, Salang. Lahpai Gam Dut (jawng sin), hte Mawhpawng KBC magam gun Rev. Shawng La, Sara. Dumhpau Mung San Naw, Salang. Ndup Gam ni hpe gumshem Myen hpyen dap ni sa rim woi mat wa ai lam, ginra masha ni kaw na chye lu ai.

Gumshem Myen hpyen dap ni kawn, nawku jawng kata hpyen hte seng ai arung arai ni nga ai nga ga baw hte sa rim mat wa ai rai nna, nta masha ni a phone ni hpe mung zing kau ya ai re lam matut chye lu ai.

Rim hkrum ai nawku hpung woi sara ni hte mungshawa ni hpe gara de woi mat wa ai lam grai nchye lu shi ai hte lawng lam hkum tsup hpe matut shagawn nga ai re.