KIO a 2023-2024 ning hpaji ladaw tsang shi awng jahpan shale
Wunpawng Mungdan Shanglawt Asuya, Ginjaw Hpaji Dap kaw na woi awn let hpaw sharin nga ai, 2023-2024 ning hpaji ladaw tsang shi awng jahpan hpe shale sai lam chye lu ai.
Wunpawng Mungdan Shanglawt Asuya a 2023-2024 ning hpaji ladaw tsang shi awng jahpan hpe May shata praw 1 ya jahpawt shale sai hta tsang shi san poi shang htai ai jawngma yawng marai 3126 nga ai kaw na, awng ai jawngma yawng marai 1893 rai nna, hkrat ai jawngma yawng marai 1233 re lam chye lu ai.
Ndai kalang san poi hkrat mat nna bai htai mayu ai jawngma ni tinang a jawng de (snr) tinang hte ni kahtep ai san jep ginra jawng de mying jahpan sa bang nna htai la mai ai hta tinang hkrat ai ginhpan hpe sha bai kahtap htai nna, tsang shi san poi hpe htai awng la mai ai lam chye lu ai.
Lai wa sai shaning ni hta tsang shi nhtai awng la lu shi ai jawngma ni a matu, 2023-2024 ning hpaji ladaw hta tsang shi san poi hpe numdaw masum lang hku na htai shangun nga ai rai nna, du wa na June shata praw maga kaw na kalang bai htai shaawng la mai ai lam chye lu ai.
Ginjaw Hpaji Dap kawn ndai zawn laksan san poi ni hpe htai shangun ai lam gaw, bai du wa na hpaji ladaw ni hta tsang 11, 12 ngu ai madang de sharin ai ladat ni hpe jashai wa na re majaw, htai shangun ai re lam chye lu ai.
