Nmawk ginra hta gasat gala majan laja lana matut byin nga
KIA Masat (3) Dap Ba, Nmawk ginra hta KIA hte gumshem Myen hpyen dap ni gasat gala majan laja lana matut byin nga ai lam chye lu ai.
KIA pawng hpawm hpyen hpung ni lai wa sai May shata praw 7 ya shani kaw na, Manmaw, Nmawk hte Manje ginra ni hta dap jung nga ai gumshem Myen hpyen dap shara ni hpe htim gasat hpang wa ai hta Nmawk ginra hta May shata 11 ya shani du hkra gasat gala majan laja lana matut byin nga ai re.
Gasat gala majan byin nga ai hta dai ni sha mung gumshem Myen hpyen dap ni nbungli hte bawm 18 lang wa jahkrat bun ai rai nna, Manmaw kaw na laknak kaba matut manoi gap bun ai lam, ginra masha langai tsun ai.
Ndai zawn gasat gala majan byin nga ai hta gumshem Myen hpyen dap ni phone, internet line ni pat kau ya ai sha n-ga, nbungli bawm, laknak kaba ni hte hkrup mara gap bun ai majaw, mungshawa ni a dum nta ni hten za hkrum ai hte mare masha ni shim lum ai shara de hpyen koi yen hkawm nga ai lam chye lu ai.
Ya aten hta Manmaw, Nmawk hte Manje ginra ni hta KIA hte gumshem Myen hpyen dap lapran, hpyen masa shaja hkat nga ding yang rai nna, gasat gala majan matut manoi byin nga ai re.
