Manje Ninghtawn kata na gumshem Myen hpyen Balik Dap hte shara (4) hpe KIA pawng hpawm hpyen hpung ni gasat zing la
Sinpraw Ginwang Ginjaw, KIA Masat (3) Dap Ba, Masat (1) Dap Dung ginra, Manje Muklum kata na, gumshem Myen hpyen Balik Dap hte shara (4) hpe, May shata 13 ya jahpawt hkying 6:30am aten kaw nna, KIA pawng hpawm hpyen hpung ni htim gasat zingla lu sai lam chye lu ai.
Gasat zingla lu ai shara ni gaw, Manje Myen Balik Dap, Tsi Rung Wang, Ping Kadu Shalawng hte Kawa Hka Jawng Kawng ni re. Ndai shara ni hta nga ai Myen hpyen ni hpe dai na maga hkying 3:50pm aten hta zup zi gasat padang dip zingla lu sai lam, shawng lam lit nga salang ni kaw na chye lu ai.
Gasat gala majan hta gumshem Myen hpyen dap ni, Y-12 nbungli, Jet Fighter nbungli ni hte bawm jahkrat bun ai sha n-ga, Manmaw Muklum kaw nna mung, gasat gala byin ai shara de, laknak kaba hpan hkum hte ding yang gap bun nga ding yang re.
Ndai zawn gumshem Myen hpyen ni gap dat ai laknak kaba si hte nbungli bawm ni, mungshawa nta kaw wa hkrat kapaw ai majaw, dum nta nkau hten za mat ai sha n-ga, wan hkru mat ai, Uwa yam nga si sum ai, nta sin nga ai mungshawa nkau hta hkala nba, asak si sum mat ai lam ni byin nga ai hpe chye lu ai.
Nmawk Muklum kaw shara la nga ai gumshem Myen hpyen hte KIA pawng hpawm hpyen hpung ni hpyen masa shaja hkat nga ding yang rai nna, gumshem Myen hpyen dap ni gaw, Manmaw kaw nna laknak kaba ni gap bun ai, sinat kaba gap hkring ai hte nbungli bai du nhtawm bawm ni jahkrat bun ai nga nna, ginra masha ni tsun ai re.
