Gumshem Myen hpyen ni nbungli bawm wa jahkrat bun ai majaw, mungshawa marai (2) hkala, marai (1) asak si sum mat
Myitkyina, Manmaw modo lam mayan na, Myothit mare kaw, May shata 13 ya shana hkying 8:17pm aten gumshem Myen hpyen ni Jet Fighter nbungli langai hte bawm wa jahkrat bun ai majaw, mungshawa marai (2) hkala nhtawm, marai (1) asak si sum mat ai lam chye lu ai.
Ndai Jet nbungli gaw, Myitkyina maga na rawt wa ai rai nna, Myothit tsi rung makau na salang U Yaw (Aung Nai Win) a, nta kaw nbungli bawm wa hkrat kapaw ai hta salang Aung Nai Win asak si sum mat nhtawm, Daw Cheery Hpyu hte Daw Tawng Tin yan gaw hkala sawng ai lam chye lu ai.
Hkala sawng ai machyi masha yan hpe gaw, ni nawn ai tsi rung hta ya aten tsi tsi hkamla nga ai re. Ndai nbungli bawm jahkrat ai shara gaw gasat gala majan byin taw ai lam nnga ai hpe ginra shiga lawk kaw na chye lu ai.
Ya aten hta Nmawk hte Manje Muklum grup yin shara ni hta gumshem Myen hpyen dap hte KIA pawng hpawm hpyen hpung ni hpyen masa shaja hkat nga ding yang rai nna, gumshem Myen hpyen ni May shata 14 ya shani hta mung, Manje Muklum kaw Y-12 nbungli hte bawm wa jahkrat gasat nga ai lam, ginra masha ni tsun ai.
Dai ni hkying 11:40am aten daram hta mung, Manmaw Hpangga Kawng kaw dap jung nga ai, Hk.L.Y (47) gumshem Myen hpyen dap ni, Nyawng Pin Ta, Tsa Padi hte Tape Kung mare de, laknak kaba hkrup mara gap bun ai majaw, mungshawa marai (5) hkala hkrum ai lam, ginra masha ni tsun ai kaw na chye lu ai.
Ndai zawn gumshem Myen hpyen dap ni gaw, hpyen nnga ai mungshawa ni a, mare dum nta hpe masing nga nga hte laknak kaba gap bun ai, Drone bawm jahkrat bun ai, nbungli bawm ni hte hkrup mara jahkrat bun ai majaw, mara kata mungshawa ni si, hkala hkrum ai sha n-ga, Uwa yam Nga si sum ai, dum nta ni wan hkru hten za mat ai lam byin nga ai re.
