Myen dap shara (10) daram hpe KIA ni matut htim gasat nga

KIA Masat (5) Dap Ba, Masat (3) Dap Dung ginra, Waimaw hte Laiza lam kaba ntsa naw ngam nga ai, gumshem Myen hpyen dap shara ni hpe KIA ni matut htim gasat nga ai lam chye lu ai.

May shata 18 ya jahpawt hkying 4:00am aten daram kaw na, Waimaw hte Laiza lam kaba ntsa naw ngam nga ai, gumshem Myen hpyen dap shara (10) daram hpe KIA pawng hpawm hpyen hpung ni kalang bai matut htim gasat nga ai lam, lit nga ai salang ni kaw na chye lu ai.

Shwe Nyawng Pin Hk.L.Y (321) dap, Katsu, Ga Ra Yang, Awng Mye (1), (2), Hka Shi gumshem Myen hpyen dap ni hte kaga naw ngam nga ai, Myen hpyen dap shara ni hpe kalang bai htim gasat nga ai lam chye lu ai.

Ndai zawn KIA pawng hpawng hpyen hpung ni matut htim gasat nga ai sha n-ga, Myitkyina gumshem Myen hpyen dap nbungli pa hpe mung laknak kaba ni hte gap gasat nga ai lam chye lu ai.

Matut nna Nmawk hte Manje ginra ni hta KIA hte gumshem Myen hpyen dap ni gasat gala majan matut manoi byin nga ai rai nna, gumshem Myen hpyen dap nbungli bawm, laknak kaba ni hte shani shana gap bun nga ai lam chye lu ai.