Myitkyina Muklum kata shana hkying (10) kawn mungshawa ni shinggan nmai pru na lam ndau
Myitkyina Muklum kata gumshem Myen hpyen dap ni kaw nna, shana hkying 10:00pm aten kawn, mungshawa ni shinggan de nmai pru na lam ndau da ai hpe chye lu ai.
Myitkyina Muklum kata shana hkying 10:00pm aten kawn, mungshawa ni shinggan de pru le hkawm ai lam n galaw na matu, gumshem Myen hpyen dap ni ndau da ai rai nna, mare lawk salang ni hpe aming laika hte tsun da ai lam, ginra masha ni kaw na chye lu ai.
Shana hkying (10) aten kawn shinggan de pru le hkawm ai ni hpe gumshem Myen hpyen dap ni rim jep ahkyak la ai lam galaw nga ai rai nna, pru hkawm ai ni hpe sinat hte gap na lam chye lu ai.
Myitkyina Muklum kata ndai zawn tara shapraw da ai sha n-ga, Waimaw ginra ni hta KIA hte gumshem Myen hpyen dap lapran lai wa sai May shata 18 ya shani kaw nna, laja lana gasat gala majan ni byin nga ai hta mungshawa ni hpyen koi yen hkawm nga ra ai re.
Nmawk, Manje ginra ni hta mung, KIA hte gumshem Myen hpyen dap lapran, gasat gala majan matut manoi byin nga ai rai nna, gumshem Myen hpyen dap ni nbungli bawm, laknak kaba ni hte shani shana gap shadam bun nga ai lam chye lu ai.
