Wunpawng ramma marai 8 hpe Myen hpyen dap ni rim woi mat

Hpakant, Ngapyaw Taw lawk KBC nawku jawng wang kaw, gumshem Myen hpyen dap ni, Wunpawng ramma marai 8 hpe rim woi mat wa ai lam chye lu ai.

Hpakant, Ngapyaw Taw lawk, KBC nawku jawng wang kata kaw Ka Din gin sup nga ai, Wunpawng ramma marai 8 hpe May shata 25 ya shana daw hkying 5:00pm aten daram hta gumshem Myen hpyen dap ni rim woi mat wa ai lam, ginra masha langai tsun ai.

Gumshem Myen hpyen dap ni Landcruiser modo achyang lahkawng hte du shang wa nna, nawku jawng wang kata gin sup nga ai ramma ni hpe rim woi mat wa ai re lam, ginra masha matut tsun ai.

Dai ramma ni hpe gara de rim woi mat wa ai lam nchye ai rai nna, ya aten Hpakant ginra hte Myitkyina Muklum kata ni hta gumshem Myen hpyen dap ni mungshawa ni hpe rim lahkawn ai lam galaw nga ai hpe matut chye lu ai.